Evian babies!

Selamat ari satu ke bala kita ke bisi mansa ruai aku sari tu ! cheers !! :-)

Ikan oh ikan...!

Apa nama ikan tu? Lalu bakani gaya manduk ke nyamai?

Enggai bula, enda kala aku meda ikan bansa tu. Kilah ensanus jauh, pangan aku siku meri ke aku ikan panjai mulut tu, sagu hati meh nya! Urang meri, kitai nerima enda pia ??
Ikan tasik ke bendar. Sementara ke ka nemu cara manduk si ikan tu, seminggu udah nganti dalam freezer din. Asai ke ka di panduk pagila.........

Pukat empelawa.

Lembau endar asai update blog/ruai kekadang. Enda lama agi baka jendila tu, nyu endur empelawa besarang!

Sebedau ke nyambut ari pengada bala anak nyu beturut minggu kutai, enggai pan enda, ngemagas ke diri meresi dalam serta sekitar rumah tu. 6 minggu aja ditinggal kemisi, nyu baka ke ditinggal setaun! Pia mega, di menua luar bandar endur kami menyanak diau tu, endang sigi agi dikelinggi babas, kayu ke nadai agi dipeda di negeri. Maya musim panas endang maya bala utai ke idup, mit besai, betambah ganti. Indu utai baka empelawa nya, geram endar aku meda, enggai enda 'beranak' ba sebelah mua jendila tauka sebelah selit pintu. Ukai nya rindu aku tu meda utai ngerayap baka nya...geremang tapak kaki iskkk !!

Diatu udah selalu dibuai, nyu nadai tentu agi nutu jendila enggau pintu. Bala anak enggau laling aku meda aku nadai ngetu meresi jendila ngena vacuum cleaner, di rara sida iya ga. Enggai ke empelawa nya pupus !! adehehh...ngemayuh anak ke digaga iya, nadai mati magang masuk vaccum cleaner nya, ka aku. Mesti bisi siku dua udah ngaga sarang ke bukai.

Bah, naka tu dulu berita sekali tu. Ila berandau baru. Hepi weekends !! :-))

02nd September 2009, Lydia is 16 yrs old!

Bonne Anniversaire !!

Happy Birthday !!

Selamat Ngintu ari Pengada, Lydia !!

Nyu enda berasai meh meda anak diri udah manggai ke diri dara. Asai ke kemari ka meda iya baru ada! Nadai kebukai, sampi aku, ngajih ke gerai belama, serta mujur dalam sekula. Kemaya ari tu, enti nadai pemandai, indu tauka lelaki, endang nadai penunga. Munyi tu jaku tangkan aku ke seduai menyadi; enda ibuh tak nyu 'ngema' digri pan, asal cukup kena ngidup ke diri jamah ila. Bagas dalam semua pengawa serta anang ibuh ke pengawa enda menuku ke tau ngerusak diri empu.

God bless you always, my dearest girl ! :-)

Camping party.

Ari pengada Anais ke bendar iya nya kena 13hb August. Taun tu genap 12 taun anak biak aku nya. Kemari iya ngintu ari pengada iya enggau geng rapat serta sekeda bala jiran kami ke rapat enggau begulai ditu mega. Alai ke ngintu 2 minggu 'kemudian' baday iya, munyi ka kaban melayu kitai, ketegal bala mayuh udah pulai kemisi magang diatu. Betebus bala mupok kemisi maya musim summer tu! Nya meh 'penusah' tudah anak aku siku tu ada tengan maya cuti. Ukai nya enda tau enda diintu gak ari pengada nya, jemah ila ngicha ke matang agi runding, ngintu sama diri sebilik aja umbas meh. Tang nadai gak hal, tambah nyu rami diri gak kami sebuat. Nyuka 3 bulan udah enda betemu mua enggau bala jiran aku ditu, nemu lelenggau gak ke pangan diri. Enti urang enda berapa enggau kitai, nadai kebuah gak kitai ka majak ke diri, lelenggau ke urang ngapa, enda pia ??

Prugrim Anais taun tuk, lain ari taun ke udah. Lama iya udah madah ke kami duai apai iya, iya ka ngintu 'camping party' maya baday iya sekali tuk. Pyjama party, swimming pool party, kala gak aku ninga. Camping party ba kompaun rumah kami din. Ukai dalam babas! Mansang meh aku udah pulai cuti ari menua kutai, ngiga tent ke tau ngundan 5 iku mensia dalam nyin. Nadai beleman gak aku ngiga, laban maya tuk, endang sigi maya urang putih beguna ke tent. Macam-macam pengawa sida iya sekumbang musim panas tuk. Laban ke lama udah tuk ila enda ulih ngeransing ke diri ba luar (outdoor activities). Musim celap belabuh ari bulan sepuluh, nyentuk ke bulan lima taun baru ila! Kitai di menua nadai ibuh ke utai baka tuk, sapa ka tan empa angat bekemping !! Syukuuur gak wai, ari manah endar kemari...siang ari umbas iya angat, malam udah celap diatu.

Baday kek Anais, di gaga serta diiyas Lydia.


Besampi ke diri empu...bepengerai serta maju selalu ba sekula !! amen...


Dikelinggi bala geng...


Gaga ati geng rapat iya, ke ari kiba nyin, Allyson, ada sama ari, sama taun enggau Anais empu, bisi datai.


Sekeda apai indai serta jiran ke enggau ngulu pengerami baday Anais.


Nyah, udah maya niri ke tent. Lydia, apai Allyson enggau laling, diujung nyin, ngadu tent kena Anais enggau 4 iku geng iya bekemping.


Nyamai diadu tent bansa tu. Dalam sejam udah tembu. Peda Calisto, mayau aku, ngenung ngemata ke utai 'nyelai' ba endur iya selalu bemain! eeechak ka ati iya; nama utai nya??!


Gamal sida 5 iya nyendia ke diri ka bemalam dalam tent nya.


hahaha! Tumu nutup tent, utai enda disangka datai. Nyamuk !!! Nasip semina datai maya pun lemai aja, udah nya nadai agi...nemu takut ke celap nyamuk kini??


Semalam malam nadai tinduk, buntau! Berandau enggau betundi ulah sida 5 tuk. Pagi tadi tumu makai pagi, lapar endar.

Udah tembu breakfast, ngemas diri serta ngemas perengka bekemping sebedau apai indai sida iya ngambi pulai, begambar baru, ke pengingat. uhuhu...bejangkit pengawa tuk! Tadi Allyson telipon madah ke apai enggau indai iya setuju ngasuh iya, mai Anais serta geng iya gak bekemping ba rumah sida iya minggu baru ila. hehe aku enggai kiruh agi...buntau gak aku laban kerja nembiak, ka tinduk tumu malam tuk.......

Hibiscus and Chrysanthemum.

Hibiscus


Chrysanthemum

Maya aku pulai kemisi tu tadi, balat endar repa kompaun rumah. Bala bunga ke benung galak ngembai tinggal mupok ujung bulan enam suba nyu layu serta sekeda mati. Laban nadai dipanjah ai. Ngumba endar gak, menua tu ampit kena pangka kemarau taun tu. Serta rakyat lalu ditagang enda diasuh manjah bunga enggau nuci kerita, laban pengawa nya masau ai ngapa.

Udah bekau ke belelak enda lama, seminggu udah pulai kemisi nya, aku lalu belabuh nerajin ke diri, muai rumput, meresi sekitar kompaun nya dia. Lantang meh ati diatu meda kmpaun rumah diri nyu pulai manah, beresi baka ke selama tu. Taja pan bedau suah meda ujan, tang malam ari udah berasai celap. Nyamai agi ari maya baru datai kutai.

Keran endar notis dilekat sebelah tiang api litrik enggau notis board, madah ke barang sapa dipeda pulis masau ai, bepanjah ke bunga tauka nuci kerita, deka diukum saman kira 200 euros, kurang lebih 1000 ringgit enti ditemu salah...balat ukum nya!! Laban ke enda tan ati, maya nyu udah malam (kira pukul 10:00 malam) belalai manjah sekeda bunga ke disayau endar. hehehe... Nyah, dua bansa bunga aku 'idup' baru diatu, iya nya bunga raya (hibiscus) enggau bunga chrysanthemum. Kapa aku ibuh ke saman nya, ukai pulis nya deka kiruh meronda malam berati ke pengawa tiap iku mensia ditu! Mayuh pengawa bukai ke berat agi patut di perati sida iya maya tu ari ke beterupong ke tudah aku bepanjah ke bunga neyy!!

Bah, bunga hibiscus enggau chrysanthemun agi majak ngembai diatu. Rindu endar meda seduai iya galak baru. :-)

Ujan oh ujan !!

Tu gambar kompaun rumah udah bekau rumput 'diinjin' pagi tadi. Lembau ka ngambar maya ke agi repa tadi. Iya ga nyu rangkai, laban ke nadai ujan nyu lebih sebulan tuk udah. Kemarau mih kami ditu ga.

Ketegal ke balat rangkai, tanah nyu balat bedebu serta berupai merekah. Bala utai tanam aku sebedau ke mupok kemisi ujung bulan kutai, nyu nadai gamal agi! Layu semua, lalu sekeda mati. Tudah laling aku ke tinggal enda enggau kemisi taun tuk, madah ke udah pansut notis ari perintah, kira sebulah udah, enda ngasuh manjah bunga, utai tanam bukai, serta nuci kerita maya tuk. Aku baru nemu pagi tadi...nasip pulis nadai mansa benung Anais ke manjah ai ba sekitar kompaun udah bekau rumput diinjin. Enti enda, pechuma kami menyanak mayar denda masau ai musim kemarau...cihhh!

Sinu meda pun bunga hibiscus(bunga raya) aku taun tuk. Nyu semadi kak gamal bak teluk kompaun nya.

Laban ke lama enda dipanjah, bunga hibiscus enggai ngembai. Sayau endar! mayuh endar nyumbuk nya dia.

huhu! Oohaaaaaaaaa! God Bless !! Malam tuk ujan !! Nyangka enda nyadi tadi laban balat endar guntur, kilat serta ribut. Pama gak pemalat ujan nya nurun....puji Tuhan !! Ngarap ke bala bunga ke agi betan di sekeliling rumah tuk, tau idup baru. Kelebih agi bunga hibiscus nya....agi ingat ke semaya aku enggau nuan, wai Mau aka Bintang Ati. hehe.... :-))

Pengabis cuti musim panas.

Chateau Monbazillac.


Chateauneuf sur Cher.


The Basilique of Chateauneuf.


**Sungai Argent sur Sauldre.


Bandar Argent sur Sauldre.


Kebun bunga di Argent sur Sauldre.


Hotel de Ville. Upis datuk bandar dikumbai 'Hotel'. Tang ukai 'hotel' endur bemalam!


Tu baru 'hotel' endur temuai diau.


Gerija.


Belakang gerija, Argent sur Sauldre.

Baru dua ari datai di rumah, ari cuti Malaysia, kamai menyanak berangkat mupok raun baru. Sekali tu sambil ngabas mentua aku ke diau di selatan Peranchis. Sempat gak aku ngambi sekeda gambar ba siti menua ke bisi dipansa jalai nya. Pama penyauh endur mentua aku nya diau ari kami tu, kita 7 jam ngena kerita mansang kin. Agi berasai penat enggau lelak meh tubuh ke bai nemuai baru nya. Agi kena pangka 'jet lag' gak. Siang ari ngantuk, malam enggai tinduk. Nyu madai asai tubuh. Mayuh endar vitamin C dipapak ngambi ke ngering ke tubuh! Tambah enggai ke tabin, enggai di bai ke spital di sangka kena jangkit H1N1 tajapan kena sakit renggak biasa! Bisi berita ke udah mansa pending aku, madah ke bala ke diau di menua Peranchis tu, enti tabin dalam jangka masa 3 ari udah pulai ari menua ke bisi enggau dijangkit penyakit H1N1, enda tau enda beperesa ke spital enggau lengkas. Lembau endar naban diri ke spital ketegal, semina renggak laban enda tan sembur air-cond, 12jam lebih dalam bilun !!

Diatu udah tembu cuti panas kami menyanak. Taja pia, bala nembiak agi nganti 2 minggu ke sekula tebuka. Iya nya kena 02hb September ila. Pagila, belabuh supping ke perengka sekula bala anak. Kiruh baru kami sebuat. And back to the routine everyday life....ka ribai!

Bah, nama berita bala kita semua? Agi kemisi gak kita, wai?

**NB : Argent sur Sauldre reti nya, menua Argent atas sungai Sauldre.

Betemu enggau Lee, Puteri, Chris & Coki.

Lydia, Anais, Duncan & Denise gaga ati betemu baru taun tu.


Fr.Ronnie, Douglas & indai aku benung 'menjamu selera'.


Lee, aku empu, Puteri. Little Gayle enggau indai iya Mildred.
Lemai ari sida Puteri semenyanak datai ari Miri, kami duai Lee (indaistarz) enggau pangan lama Puteri, Mildred, di bai dinner ba Topspot. Gaga endar ati, laban ke udah lama endar kami tiga ngaga temu janji tu.


Tengahari ari siti, aku, Coki, Puteri enggau Chris betemu janji sekali tu ba Grand Magherita. Iya ke bendar kami besemaya enggau 3 iku agi kaban blogger ari Kuching tang laban penanggul ke enda ulih di seliah ke, naka 4 iku aja kami sebuat ulih be'high tea' enggau Puteri.


Ari mija kiba, cigu Kathy enggau Coki. Ari kanan (ari ujung mija), Puteri, Chris enggau cigu Sumang. Kathy enggau Sumang nyempulang Chris ke Kuching. Nyu rami ga kami sebuat tengah ari nya. Berenyang hotel !! :-)


Anang irau....she is as soft as a kitten! Luv ya cuzzy...hehehe


hey Chris...thank you for being there! Agi belala berandau.

To Charlene and Debbie, enggau netbook tu, tajapan seduai jauh (di Australia), sempat ga seduai iya enggau kami sebuat berandau maya 'high tea'. Puteri ukai enda mai netbook iya, tang enda ulih kena dalam restoran nya, laban nadai 'free wifi'. Kami duai Coki ngena celcom broadband...semina di luar sendi pool bisi 'free wifi' nya, tang bala abis enggai kin, nadai 'air cond' ! Coki...betemu baru jemah ila, anang enda ingat mai kain batik....hihihi

Kemisi udah tembu...

....all nice things comes to an end, ka ribai! Bah, udah datai di France pagi tadi. Sari tumu pulai ari dijangka. Agi belelak dulu ney, ila aku nusui berita panjai agi serta bekunsi enggau kita gambar baka selama. :-)