Anais Emilie - 13 taun!

Agi belala ka meda bala anak, mit belama. Munyi ka Indai Dara, enti ulih asai ke enggai ngasuh sida iya besai, ka dikembuan baka anak patung kenu !

Selamat Ngintu ari pengada ke 13 ke anak dara biak aku tu !

Aram makai....

Ensanus, indai aku pulai meli lauk, bisi tetemu ke 'kuih' tu. Penganan iri ka kami. Aku enda tentu berapa makai penganan iri, kelalu beminyak sepi aku. Penganan chuan enggau penganan jala ka aku makai. Tang anak aku ke biak, Anais, agi belala ! Lalu ngasuh inik iya meli baru. Nyahhh, mupuk meh indai enggau apai ku ke pasar tadi, ngica ke pangan sida ke bejual ba market sayur bisi ngaga penganan iri saritu.


Buah belimbing. Ulih meli mega. Dini cino ka meri ! Lama udah tetengguk ke buah belimbing tu.


Tu sayur dikerindu aku! Sayur ari sabah. Enda nemu dama sayur tu endar, semina nemu iya datai ari menua Sabah. Panduk gulai pusu enggau bawang aja, akaiii...tepantup ati !

Raun raun.....

Kemari nadai pengawa, kami menyanak lalu raun ke puak bandar Kuching. Endang sigi 'tabiat' aku diatu, munyi ke kaban kitai bansa melayu, enti mindah enda jauh ari kamera. Nasit ari enda tentu angat alai bisi ati ka ngambar utai ke di pansa.

Berita ari bumi kenyalang.

Mayau digari sama ngerami ke pekit main bol sedunya ke diatur di South Africa.


Dewan Undang Negara baru negeri Sarawak, digambar ari Waterfront.


Astana lama enggau ayuk iya ba sungai Sarawak.


Lydia enggau Anais, raun enggau aki seduai iya ke Wisma Saberkas.

Udah datai di menua ditu kami menyanak. Kemisi nyentuk ke pun bulan 8 ila. Gaga ati betemu enggau diri sebilik, kaban belayan serta bala pangan. Nyu baka ke enda ibuh ke ruai tu agi. Bah, tu dulu bala gambar ulih dibantai sekali tu.

Nama berita kita deh?

Bunga poppy.

Tengah ari tadi, nurun ngambi anak pulai sekula meda mayuh endar bunga poppy ngembai. Nyadi bunga tu ka endar tumbuh ngimbai madang gandum enggau jagung.

Lebih dua taun udah meda bunga tu galak endar ba ladang umai kami ditu. Ngelamatu, nyu ka pupus bunga tu, laban di masuk ke dalam kategori rumput lalang. Ngachau utai tanam. Nya ke munuh enggau racun. Ukai semina bunga poppy ke pupus, mayuh bunga babas bukai meh ke pupus mega, nadai agi dipeda diatu. Bala indu utai pan bela nyadi mangsa, baka sida kesulai. Nadai agi kesulai ba menua kami tu. Ketegal bunga babas ke bisi madu, pemakai kesulai, nadai agi tumbuh. Kira ke belelang ke bukai meh sida iya, ngiga pemakai tauka punas nadai agi!

Diatu enda ngena rachun kemikal agi urang bumai munuh rumput lalang. Nyu mulai ke diri ke chara lama. Rumput nya ditebas enggau injin. Enggai nyadi enda ngena injin, beratus ikar pemesai ladang ke diintu ! Luput ngena parang enggau bikung aja ngereja nebas rumput !!

Bah, naka tu aja berita sekali tu. Benung kiruh bekemas meh aku diatu. Bekemas ka mupuk kemisi minggu baru ila. Panjai endar ari enti dianti ka mindah.....

Football World Cup - South Africa 2010

Aram enggau nyukung menua ke dipilih, dikerindu maya pesta main bul sedunya di menua Afrika Selatan taun tu, taun 2010. Tiap empat taun meh pengawa milih menua ke landik serta tegas main bul tu. Taun 2006 suba, menua Italy menang, megai mangkuk piala dunya. Ni maya menua Malaysia enggau ney??

Selamat Ari Gawai !

Tanda poco poco

Semadi ke ngenat ke ikak enda lama laban udah bebendar nyendia ke sekeda utai di dapur, ngemas ruang bilik, kena ngenatai ke pengabang maya gawai ila; udah badu ngemas enggau nyapu di mua rumah, ambik ke utai(mayuh macam barang tengkira meh) enda ngarey baka ke selama ! ahahaha Udah siap ke endur ngelulun di belakang rumah? Adu memanah ke endur nya, enggai ke kiruh ngapa gak bekangau ke sida bomba maya begawai! kuuuuss semangat, anang ngajih. Kiruh kita ney, bala ibuk, aya, kaban, suku juru serta pangan. Sigi gaya, setaun sekali. Enti enda dua kali gak...nyambut ari krimas deh. Ila gak kitai berandau ke nya......

Bah, aram wai, unggal, igat, dara, entak ke kaki enda lama, gilik ke pungung, angguk ke pala, meda tanda poco poco ari Sweden ! Enda kitai arap enti ditusui pia aja enti enda meda video tu. Rindu meda sida ribai nemu nitih rentak poco poco nya. Terima kasih ke Pak Shony (ari Indonesia) ke ngajar sida iya.

Burung achang.

Suah endar aku udah deka ngambar burung achang. Selalu enda mujur. Di beri ke umpan meh, tang nemu endar sida iya. Maya aku leju nganti, sida iya lalu datai makai umpan. Nemu endar beduan! Tengah ari tadi, enda dikibuh aku. Enggai mujuk agi. Kapa meri umpan. Nyahhh! nemu gak siku tu datai, lalu inggap ba dan kayu. Baka ke berati ke ulah aku. Enti nemu bejaku, pelaba aku, deka nanya nama kebuah nadai ruti ba sendi pun kayu endur iya inggap nya! Benung iya ke 'belagu' nya, aku lalu ngambar iya. Naka pemesai burung achang nya. Lama iya jadi 'model' aku, malik ke kiba, malik ke kanan iya......gap lah iya ka ati iya !! ;p


Burung achang.


auk, gap nuan....!

Bemain enggau kamera 2

Indu kemindang di gambar tengah ari tadi. Gaga ati, laban pedis endar ngambar sida tu. Enggai jenuh ! Benung ke ngambar seduai tu tadi, nasit endar, tak sama enda mindah lekat ba daun bunga. Engka udah kenyang merarau kini? Mayuh endar indu kemindang tu ba kebun bunga dia. Kenu ka urang tuai ditu, manah ngembuan indu kemindang, laban makai 'kutu' ke inggap ba bunga. Bunga galak agi enti nadai kutu nya. Petua bekebun meh nya!


Indu kemindang ...no 1.


Indu kemindang..no 2. (Ni bajik agi??)



Nyu udah lemai ari, tu jam pukul 6:00 lemai, meda bulan baru ngembung ka kitai. Tampak endar, laban langit ciru, nadai remang. Tambah mega mayuh endar bilun mansa maya nya tadi. Aku lalu ka ngambi peluang ngambar bilun enggau bulan sama. Tang utai ke dianti aku endar, bilun enggau bulan kira ke berimbai, enda tentu jauh iga ari pangan. Kala aku meda gambar baka nya. Ka nguji gak aku. Sejam aku nganti, nyu pedis pegu, bai ke suah melenggik ke langit. Lalu enda gak 'berimbai' nunda ka ati aku. Naka penyemak seduai iya meh ke ulih digambar aku sekali tu. Pama meh.....