Sunday, January 31, 2010

Nusun puzzles.


Puzzles Petronas Twin Tower.


Puzzles mayau.


Pemesai *puzzles pieces* udah tembu tu 70cm by 50cm. 1000 pieces. Sama bela pemesai 2 iti puzzles ke diadu ke Lydia. Petronas Twin Tower nyin ditembu iya taun 2007. Lama iya nembu ke nya ketegal ke bisi peresa besai sekula maya nya. Nyu enda ingat agi berapa pengelama tebengkalai prujik tudah tuai. Puzzles mayau nya naka 5 ari aja iya nembu ke nya. Sebedau Krismas 2009 tu tadi. Laban gambar mayau nya kiut endar, ka iya !

Anak aku siku tuk endang rindu ngadu puzzles kenyau ari mit. Umur iya 4 taun iya ulih nembu ke puzzles ke 200 pieces nya! Nadai beleman iya nembu ke puzzles nya. Nadai pengirau gamal iya ngadu ke utai nya. Nyu aku tik alit ati. Alit, laban kaler tik ka sebaka serta sebaka saiz meh. Keni kati ney?? Enda aku ngemedis ke untak bekira ke nya, neju ke anak aja ngereja ahhh... :-)

*jaku enda ulih salin ke iban.

Wednesday, January 27, 2010

Rumah mit.......



Naka pengerindu agi mit kelia meda cerita sida Laura Ingalls sebilik tu. Agi diingat belama. Nasip ga RTM maya nya enda ngayan ke cerita tu laun malam. Enti enda salah ingat aku, tiap ari lima, jam pukul 8:30 malam, belabuh kami sebuat begau berebut ke penuduk ke semak TV. Nadai pengirau ka nurun sekula ari siti. Enda sekula ari enam. Gagit ati semua meda cerita 'Little House on the Prairie '. Nostalgia wai !! :-))

Saturday, January 23, 2010

Video ABC Ngelantak Kening !



Lama enda ngabas ruai aku tu. Ukai nama, nadai ketegal berat, ketegal ari. Nadai nemu ka mindah maya ari enda berapa musim celap tu. Tak ati diau di rumah meh, ngambi ke enda pedis tulang enggau tubuh gasak celap. Tambah nadai endur ngerindang ati ke badas meh maya tuk. Lembau gak mantai ke gambar enda manah dipeda. Bedau maya kemisi gak diatu. Bisi kemisi, maya tengan bulan 2 ila tang kami menyanak nadai pugrim mindah kini2 sekali tu. Bisi pekara berat ke anak gak udah diagih maya kemisi sekula bulan 2 ila. Ila bekunsi cerita ke perkara nya enti semua dah di 'bereskan' munyi ka suah didinga dalam cerita indonesia.

ahhhhh! berandau ke wayang...ditu aku mantai ke video cerita niang P.Ramlee di salin ke jaku iban. Amat stidi bala 'kaban' kitai ke nyalin ke wayang nya. Rangkai ngeli ketawa ninga jaku sebut bala kitai dia. Bravo !

Monday, January 11, 2010

Raun ke Paris malam ari.







Lama udah besemaya enggau sida anak ka mai raun ke Paris maya malam ari. Kenyau ari urang belabuh masang api pelip2 kena ngintu ari krismas kutai. Tang semaya tu sudah tebengkalai, ketegal ari enda manah. Enti celap aja kira ke ulih ditat ke. Tang enti nyu enggau ujan kabut, celap gak agi, tau enda ibuh nurun. Ukai nyamai sakit renggak tegal celap.

Demalam kami menyanak mujur mupuk raun ke Paris. Begari naka iya, mayuh kereneh. Bebaju berapa lapis, baju jikit tebal, betupi, bestukin tebal, bekarung jari, ngena kasut ke betul. Laban ari agi balat celap, taja -2°C, pama ngenat ke nya deh enti di luar din. Pasal kasut, enda aku ka ngena kasut tunjik lawa nya, taja ke Paris kin. Manah agi ngena kasut ke endang malut kaki,ngambi ke enda celap lalu tan kena bejalai ba endur ke licin. Licin laban ais.

Sebedau datai din, aku telipun ke pangan aku siku, ke baru pindah gawa di menua Peranchis tuk. Kami sebuat lalu betemu janji ba siti kedai sendi Champs Elysée. Laban tudah ke bedau tentu lama udah ditu, ngiga kaban meh enggau raun di Paris din, maya ke bisi peluang. Bendar kami sebuat bejalai. 3 jam bejalai lubah sambil begambar ke endur ke badas dipeda, baka sida turis kenu ! :p

Tuesday, January 5, 2010

Berita chelap!

Nadai tentu berita ka dibantai sekali tu. Semina berita chelap aja2. Nitih ke maya ari tu, bulan satu tu meh bulan ke pemadu chelap ba menua Peranchis tu.

Pama gak penyelap dua ari tuk ke udah. Nyu pedis lengan ku ngikis ais ke malut cermin kerita. Lebih 10 minit ngangat ke kerita sebedau bejalai. Lemai tadi, udah bekau ke ninga pesan ari ramalan cuaca madah ke salji labuh baru malam tu lagi serta suhu penyelap -5°C, aku lalu ngiga pua tebal ke enda dikena agi, ba bilik store din, kena mungkur kerita aku. Pagila ka tumu gak mindah ngena keritanya, nganjung nembiak sekula.


Ais enda tebal tang 'binking' ! Maya tu benung -4°C....


Tukang kikis....

Friday, January 1, 2010