Tuesday, December 16, 2008

Christmas Greetings !

Image Hosted by ImageShack.us


Gaga ati meda tikit bilun udah diambi. Sebedau tu, gagit ga madah ke diri pulai kemisi Christmas ke menua tang ati bisi pengirau mimit laban tikit apin di peda. Tajapan endang nemu diri amat pulai, ukai beduan diri empu. Peda kita lawa endar endur mandang ke tikit nya, dalam stukin Santa Claus ! Christmas presents ke pemadu badas ari keudah meh nya.


Image Hosted by ImageShack.us


Tu sekeda Christmas kad ke udah datai seminggu tu. Ke bala kaban-belayan enggau pangan, jauh tauka semak, aku ngari ke kami menyanak meri besai terima kasih ke kad ke di kirum kita. Dua iti kad ke ba mua endar nya datai ari Quincy, USA enggau UK. Terubah kad di terima ari pangan blogger. Once again, many thanks to both of you for your wonderful greetings !

Sebedau aku ngundur ke diri, belepa enda lama, enggau jari sepuluh aku minta ampun enti bisi tesalah jaku maya ke berandau betundi. Di kira ke nadai tentu ari aku udah tu ka ngintu ruai tu, kiruh bekemas. Bah, mupuk dulu aku wai.

"Selamat Ngintu ari Christmas serta Selamat Nyambut Taun Baru 2009 ke ka datai ke kita semua"

"Joyeux Noël et Bonne Année à tous !"



Saturday, December 13, 2008

Penatai Santa Claus !

Image Hosted by ImageShack.us


Tepantup ati sida tiga sekawan tu udah betemu enggau Father Christmas. Ari enam minggu dulu nyin kemari ba endur kami diau ditu penatai Father Christmas endang sigi dianti bala anak mit, nembiak, apai-indai, aki-inik meh bela gagit ati ka meda ia.

Ia ke endar enti ka begambar enggau Father Christmas tu mesti bebayar. Endang bisi mai mini studio enggau tukang gambar ia empu. Studio tebuka, ba dalam tent. Di kelinggi ke gerai bukai endur nyual mayuh macam utai kena ngrindang ke mata enggau ati. Gerai makai enggau ngirup pan bisi. Nyadi kami sebuat tu, laun datai laban bisi limpang suping kebukai dulu, nyu ka tembu pengawa rami mensia mayuh baru kami datai. Belanda2 nuju studio nya tadi meda tudah apai Christmas udah ka ngemas ke diri pulai. Tang meda bala ke nyu seput2 udah belanda nuju ia, dia ia lalu ngembai ke dua piak jari ia enggau senyum, mai begambar....free !!

Tuesday, December 9, 2008

White Christmas

Image Hosted by ImageShack.us


Image Hosted by ImageShack.us


Image Hosted by ImageShack.us


Lemai kemari ngiias kayu Christmas tu. Ka jaku enggai kiruh taun tu laban ke ka pulai ke menua bekrismas. Tang enda ga nyamai ati. Sinu ga ati meda rumah diri nadai apa-nama kena ngenanda ke ari mulia kitai kristin tu. Gaga meh sida anak, bisi endur Father Christmas ninggal ke presents ila ka ia ke biak.

Bah, sapa lansik meda mua tukang gambar ba gambar ke penudi nya ??!

Image Hosted by ImageShack.us

Image Hosted by ImageShack.us


White Christmas! Yahooo !! Benung labuh salji ba luar dia. Balat agi ari keutai. Lama agi meh sekali tu. Nyu burak magang utai nya dia. Ngenang ke taun2 ke udah, baru ia meh salji suah labuh maya dia tu. Laban jarang endar bekrismas bisi salji. Ujan ke suah agi. Selalu ia tunga bulan satu ila balat endar dipuput angin celap endar serta besalji.

Enda lama lagi malam ari tu. Diatu baru ka pukul 3.00 lemai. Dalam sejam lagi malam ari. Lama udah enda meda ari terang, matapanas jarang pansut. Asai ke diau dalam lubang gua ! Well, c'est la vie et c'est ainsi, ka peranchis ! I'll be home for Christmas, ka lagu Nat King Cole. Luv ya Nat !! hahaha

Sunday, December 7, 2008

Miss France 2009

Image Hosted by ImageShack.us
Madamoiselle Chloé Mortaud, Miss France 2008-2009. Berumur 19 taun, peninggi 1m 80. Agi student, ngambi diploma International Commerce di siti universiti di Toulouse, tunga ke selatan menua peranchis.

Image Hosted by ImageShack.us
Celum miss kami taun tu. Ukai mantah, ukai bejai ke tudah tuai wai. Deka madah ke menua peranchis tu pan cukup pupu bansa diau ditu. Miss sekali tu kacukan peranchis enggau american (indai ia ari Mississipi, USA). Huhu....

Image Hosted by ImageShack.us
Anggun, penyanyi ari Indonesia ke popular endar ditu, jadi siku ari 7 juri di taga ke milih bala indu bajik lemai kemari.

Friday, December 5, 2008

Mai Calisto check-up.

Image Hosted by ImageShack.us
Gamal Calisto ringat di bai annuel check-up. Bendar ngumpan ia ngambi ke ka masuk dalam sangkar tu. Alai nyimpan ia dalam sangkar, ketegal undang2 ditu. Kena saman pulis enti jelu di peda enda dalam sangkar dalam kerita. Enggai ke ngacau kitai driving.

Image Hosted by ImageShack.us
Datai dalam bilik klinik ungkup ke jelu, ia enggai pansut agi ari sangkar. Getar-getar takut. Ukai keterubah ia, ga ia dibai kitu tang endang sigi gaya Calisto. Nangi ke urang bukai kelimpah ari kami sebilik. Pansut ari sangkar ulih nyungkil ga, lalu meruk ka diri baruh sink!

Image Hosted by ImageShack.us
Udah di peresa ngeli, jantung enggau ditimbang (6 kg), ia lalu di cucuk enggau ubat kena nagang dirampit penyakit jelu ke di kenangi baka penyakit 'gila ukui' ka kitai. Di jeling ia lutur nya, enti ulih engka ka direkak ia kini ?! Di beri ubat pil kena muai cacin dalam perut meh. Kiruh aku sari nya laban ia. Calisto tu rindu makai pemakai mayau dalam pikit, cap Wiskas. Enda anchi-anchi utai pakai ia, nya besai baka nya. Enggai makai lauk ikan, lauk dagin aja. Raya jelu tu !!

Image Hosted by ImageShack.us
Udah tembu peresa, sekali tu ia empu ngenama ke diri dalam sangkar. Lalu terus mai pulai ka gamal. Enti tau bejaku, baka nya meh runding ia, sangka aku. Kaki ia ke bakal minggu nyin kemari udah gerai. Diatu 'on diet' ia, ditagang lutur enda asuh lebih ari 6 kg pemerat ia. Asuh besenam ga..tuchum serta geli ati ninga ajar lutur nya. Baka ke ngajar ngasuh ngibun anak mit !

Wednesday, December 3, 2008

Estrella - Stay & Ternyata







Terubah aku meda video clip tu, kumbai aku group penyanyi ari Indonesia. Sida tu ke endar ari Malaysia. Syabas !!

Monday, December 1, 2008

Bulan Penudi 2008

Image Hosted by ImageShack.us
Guess whooooo ?


Apai enggau indai urang tu, kala jadi keling enggau kumang menyarung semalam aja, dalam taun 1990 kelia. Tu meh ke penudi ia aku ngena ngepan iban. Gamal tak relax aja dia, maklumlah pengantin baru ! Tang...apuuu...naka merinsa ngenat ke diri di gambar baka nya ! Malu naka ia ga agi...enti baka tekura asai ke enggai pansut agi ari tempurung. Lebih 20 kamera nuju kami duai, nyu keli-kelip kin kitu, remban semengat enti enda tan !!

Diatu bisi anak dara ngambi alih tempat. Anak aku ke tuai nya ka bengepan. Manah endar costume iban ka ia. Nemu ngerara, madah ke ngepan kena aku enda penuh ka ia. Ia meda bala gambar sida petunggal ia bengepan bisi ngena 'head dress' (sugu tinggi). Lalu nama kebuah aku nadai ngena malam nya. Alai kebuah enda ngena laban buk udah disep ba saloon, enggai kiruh agi. Amat cawey ga pala enda ngena sugu tinggi. Anak aku ke biak nya, rindu ngena baju cina 'cheongsam'. Sapa ka purih ia ??! Nadai ga kami sebilik bisi bekaban enggau cina.

Enda berasai, ari beganti minggu, minggu beganti bulan, bulan beganti taun. Umur pan majak meningkat. Sayau amat enda nemu iga nusun ke leka pantun ngena jaku bansa diri kena nyema ke tu. Aku rindu besema besampi ngena jaku iban ke bebungai-bungai ke ka urang tuai. Engka nya meh nanda ke diri udah berumur diatu. Kelia menya nadai bisi ati ka belajar. Nyesal asai ati.

Nasib kitai mensia endang nadai sebaka. Tuah limpah dijari Tuhan, enda pia? Ari-ari aku meri puji Tuhan ke udah meri ke aku pengidup umbas ia meruan, celap lindap ninting ari. Nadai tentu beguna ka mayuh reta asal diberkat enggau pengerai tubuh, likun dalam rumah tangga diri serta ulih limpang nemuai tiap taun betemu enggau kami sebilik, diri sekaban ke disayau di menua din. Puji Tuhan.....


"Selamat Nyambut Ari Christmas" ke ka datai ke semua temuai, pangan, kaban belayan ke mansa ditu.