Saturday, August 9, 2008

Pait Manis pulai kemisi

Minta ampun mayuh mayuh dulu laban ke kira ke bula ke semaya ke deka update ruai aku tu sekumbang ke cuti tu tadi. Ukai enggai tang kadang-kadang semaya enggau diri empu pan tau tumpas laban baka kitai ke bejalai enda milih kini-kini tau bisi penanggul di rantau jalai.

Taja pia sekali tu aku sempat betemu enggau bala kaban belayan ke udah lama udah enda enggau betunga mua ketegal ke nitih arus pengidup kitai jemah ari tu, sama-sama nitih ke periuk asi diri empu munyi ke sempama jaku sida ke tuai.

Baru ke lima malam kami menyanak udah datai di Kuching, inik ipar aku mati, sakit tuai meh nya. Taja pan aku enda sempat bekelala enggau ia tang bebasa ke urang tuai, kami sebilik lalu enggau nyenggai ke menua ipar aku nya, tunga ke kampung Taie kin. Menyadi aku ke biak nya baru niri ke rumah tangga ia enggau indu bansa bidayuh ari kampung nya. Kasih ga tudah. Deka ngerami ke pengawa tikah seduai ia meh kami sekaban kena 2hb August tu tadi. Tang laban bebasa ke ulit mati enda meh jadi taun tu. Lalu enti nadai penanggul taun baru ila meh seduai ia deka ngurus ke pengawa seduai ia baru.

Aku laban ke apin nyandik litup enti enda mansa cyber café, nadai ga ari deka natuk seleka dua berita. Tambah mega, ukai ngelembung diri empu, tak asai ke jadi tourist ba menua diri empu diatu. Mayuh endar utai ka peda, ka digagai. Nyu menyenep kin kitu ke kamera nya! Kadang-kadang di perening urang meh pengawa aku nya, enda ibuh. Ma merening lama, bisi ga ari negur urang nya...... nak foto ke??! Enti senyum, ka ga ngambi gambar sida ia, nya tak merening baka ke kitai tu 'alien' ari planet Jupiter!!

Kami duai petunggal aku Doris (Puteri) nyu bepeluk gaga betemu baru di Miri din. Bisi ga nitis ai mata mimit, enda nemu bagi enggi sapa mayuh lah! Balat lelenggau kami duai nya, udah 17 taun enda kala betemu. Ari kami duai ngangkat diri dara kelia (kenu ka sida inik) kami duai belabuh rapat enggau pangan diri. Aku ninggal ke ia dulu, nitih ke sulu ati ke menua ribai tu. Enda aku sangka ia pan bisi ga sulu ati jauh baka aku. Diatu kami duai sesama nitih ke pengidup, bisi ruai bilik kediri and a family to call our own (enda ulih di salin ke jaku kitai, wai.)

Pulai ari Miri, indai aku enda mukai-mukai kena asthma, kira ke balat meh nya, lalu di bai ke hospital (SGH) laban ia pedis enseput. Ia endang lama ngembuan pemedis tu, tang enda kala ngemalat sekali tu. Udah ke diperesa bala lutur din, dia ia bisi ga darah tinggi enggau diabetes (category 2). Akai rai, nyu 3 in 1 pengawa geng tu!! Ngelama tu ia makai ubat aja kena ngurang ke gula dalam darah ia. Seminggu ia ditan sida lutur di SGH din, lalu diatu nucuk diri enggau insulin sekali sari, laban nyu balat diabetes ia nya. Senggak (asthma) ia udah kurang ga. Macam-macam meh pemakai ari2 kitai baka asi nya disekat serta di kontrol ke, enti enda tau nganu pengerai ia ga.

Bah, lama udah aku tu nusui berita aku tu. Bala gambar udah di upload tadi tang udah ke lama enda ngena komputer tu, tau enda ingat ni bagi utai ditekan. Engka agi lelak kini. Dalam bilun kami pulai tu tadi balat endar di guyat ke angin di langit din. Tigabelas jam ari Singapore enda ngetu kubut-kubut bilun nya. Pedis amat ka ngenat ke diri. Bisi berasai takut ga, nyu ngenggam semengat sekali dua laban kelalu balat beguyang. Enda kala asai nya sepi aku. Baru ia buyan nepan bilun.

Saritu udah ga berasai nyamai mimit, taja pan mata nya kadang-kadang agi ka tinduk. Enti di tunduk 3 ari, 3 malam enda angkat ari katil baru ia nyamai amat. Enda ga sampai ati baka nya, mayuh endar gari serta barang deka di kemas dulu. Aha, sida serai, daun kari, ikan pusu.....mesti di simpan dulu nya, nadai cina nyual ditu!

4 comments:

  1. sigi asai kenda cukup ari neh wai maioh amat pengawa deka digaga maia cuti ni bisi entu ari nunga litup. Maioh bekal bai pulai neh sigi sengit bilun mai bekal nuan pulai ke menua sida ribai kin hehehe.

    ReplyDelete
  2. andan,

    ukai enda singit agi bilun, nyu sarat! selalu enda cukup ari munyi ka nuan ma pulai kemisi. asuh lama agi enda ga tan, ukai pia ngenang ke langkau ditu ga deh.

    ReplyDelete
  3. tabi akituai,

    anang malu, mansa meh dia.

    ReplyDelete