Selamat Nyambut Taun Baru 2010 !

Aku ngari ke kami sebilik meri 'Selamat Nyambut Taun Baru 2010' ke kita semua. Tumu aku mantai ke pesan enggi aku laban kami menyanak enda ngintu di rumah kami empu sekali tu. Udah besemaya enggau bala kaban deka begempuru makai ba rumah sida iya lemai 31hb Dis. ila.

Aku ngarap ke kitai sama ninggal ke taun ke 2009 tu enggau andal ati lalu ngelalu ke penatai taun baru enggau ati ti badas, lantang, nadai ngingat ke barang utai ke bisi nanggul ke ati kita ngelamatu, muai pengirau lalu besampi ke pengerai tubuh, ngenyauh ke diri ari pemedis, limpah tuah datai mayuh agi ba taun 2010. oooohaaaaaa oooohaaaaaa :-))

SELAMAT TAUN BARU !!

Penunga Burung

Sekumbang kemisi nembiak ujung taun tu, ke beserempak enggau ngintu Ari Krismas serta nyambut taun baru dideka datai ila, memanah wayang dibantai ba TV maya lemai ari belabuh ari pukul 8:30 malam. Prugrim siang ari ungkup ke bala nembiak. Baka cerita ari Disney Channel enggau wayang katun.

Lemai tu aku meda cerita wayang baka ke dibantai diatas nya. Cerita burung - 'Winged Migration'. Rindu endar meda pasal penunga serta penyauh sida iya terebai ari siti endur ke siti endur. Ngiga endur ngenduh ke diri betelu ngambi ke enda pupus. Ukai nya ari sungai ulu ke sungai ili aja penunga sida iya nya terbai. Alit gak ati meda sida iya ngidup ke diri ari menua celap (nitih ke gaya ari mega), lalu ngiga menua ke angat, lalu mulai ke diri baru ke menua asal sida iya. Besai meh kuasa Tuhan meri tiap jelu ke idup didunya tu penemu taja pan ukai baka gamal kitai mensia.

Benung meda bala burung tu mega aku ingat ke Puteri ke rindu begambar ke burung. Bah, Puteri, enti bisi ari anang enda meda cerita tu nuan, lots of useful ideas here, ka ribai!! hehehe

Nyah naka tu berita aku lemai tu. Ka meda pengujung cerita burung nya. Mupuk aku.

Kari manuk enggau ketupat.

Lemai tadi, aku manduk kari manuk enggau ketupat ke kami menyanak. Suah gak udah manduk kari manuk tu. Tang tu terubah iya aku manduk kari dempa enggau ketupat ditu. Tekenyit pangan aku siku tadi ninga aku madah ke iya aku deka manduk pulut ketupat! Lalu nanya aku, dini bulih daun nyiur kena ngaga ketupat di menua Peranchis tu?! Gelik ati aku!! Auk, amat bemimpi tetemu ke daun nyiur nya ditu! Peda ba gambar di baruh nya....



Nyah, tu ketupat dipanduk aku tadi. Pikit beli dibai pulai kemisi bulan enam kutai. Pama gak ulih dikenyadi ketupat pulut disedia baka tu. Tu meh gaya pemakai ke di ketengguk maya ngenang bala kaban, pangan, diri sebilik ke berami ngintu ari Krismas di menua din.

Bah, mayuh udah rumah endur kita ngabang saritu ??

Biskit krismas.

Tengah ari tadi aku sempat ngaga dua macam biskit tu. Butter cookies bepuak ke jam enggau butter cookies 'cap' gaga Anais. Gagit ati anak dara aku ke lumur dua nya bai aku ngaga biskit nya. Siku tu endang sigi rajin enggau aku didapur. Bagas ringat ngelamatu laban suah diburu ari dapur. Endang sigi gaya kitai ke indai tu, enggai tentu diselut anak maya ke kiruh 'entepa' kin kitu baka maya dia tu.

Pagila deka ngaga kek kami duai. Lemon pie iya ke endar udah diati aku. Rindu makai lemon pie, laban bisi asai masam!

Tajapan nadai nyambut pengabang datai maya krismas ila, tang semampai begaga ke pemakai bemacam bansa gak kami sebuat. Baka taun ke udah mai jiran siku dua beserumpu enggau kami menyanak. Tang taun tu, kami menyanak aja, bala jiran mayuh 'balek kampung' taun tu.

Taun siti nyin suba, enda enggau ngintu krismas di menua peranchis tu kami menyanak. Terubah iya pulai ke Malaysia ngintu krismas enggau kami sebilik. Naka pengerindu bala aku meda pengerami kitai ngintu ari besai Tuhan Jesus kitai din. Nya meh, enti nitih ke ati endang ka pulai belama maya tu.....

Bah, ka nyendia ke bala utai panduk ke pagila. Tumu berapi laban ka nurun sembiang lemai. Ngarap ke ari enda kelalu jai (ramalan cuaca naga ke ari kabut lemai pagila)....endO berapO !

Krismas mood......!

Nginjau lagu Krismas 'Jingle Bells' ari Ray Coniff Singers kena nyempulang video sekali tu. Video maya salji ari ke tiga. Balat gak labuh pagi tu. Suhu penyelap di luar din -2°c aja! Aku enda rajin 'beganjuh' maya dia tu. Semina mayau aja keluar masuk ari rumah. Rindu endar iya meda salji nya, begagai enggau anak mayau jiran aku sepiak nya. Nyamai endar jadi jelu mayau, enda nemu takut ke celap!!

Salji, salji !!

Hehehe...gaga ati meda salji mayuh labuh saritu! Kira ke 'sah' meh ngintu ari Krismas ke ka datai enda lama agi bisi meda salji. Nitih ka berita ari upis pemansik ari (betul kini tu??), salji deka nurun nyentuk ke ujung minggu ila. Reti nya balat pemayuh serta tebal nya ila. woohooooo...ka ngaga snowman bala anak !!

Ari taun ke udah, tu meh terubah iya kami meda salji nurun tumu. Ngelamatu suah nyambut ari Krismas maya ujan. Ujan tang celap gak deh! Musim salji belabuh tengan bulan satu aja.



Let it snow, let it snow, let it snow..... :-)) (Lagu ari Ray Coniff Singers!)

Christmas Greetings!

"Selamat Ngintu Ari Krismas ari kami sebilik ke semua kaban belayan serta pangan ke mansa ruai aku sekali tu"

Have a blessed Christmas everyone !

Kayu krismas.

Bah, udah bediri kayu krismas kami menyanak. Kaler mirah enggau burak dikedeka anak taun tu. Aku tu nitih aja. Kelia aku aja gagau ke pengawa bansa tu. Diatu udah bisi 'pembantu', wahhhh...jadi inspektor aku diatu nyeh!

Pagila enti ari enda ujan, ka ngadu ke api kelip2 sebelah jendila rumah tu. Kami ditu, gagit magang ngiyas ke rumah maya krismas tu. Ukai nama, puas endar meda ari mendung serta nadai ngetu ujan maya celap tu. Tambah rindu meh ati meda pemanah api kelip2 nya! :-)

Rugby

Ka meda pemain ari New Zealand (The All Blacks) enggau pemain ari France (Les Quinze de France) belaban, 'friendly match', ka ribai, ba TV malam lagi. Belabuh pemain kira pukul 8:35pm jam peranchis.

Nadai minat meda rugby ngelamatu, tang enti pasukan 'tuai rumah' bemain ka gak meda. Nyukung kaban! Nyerauh ngapa maya ngemasuk ke gol, sambil makai kacang, ngirup kupi....ngarap ke urang ke disukung menang meh!

Bah, mupuk aku..ka berapi enggai ke laun makai...

Ari jai.

Tu gamal gaya ari di menua peranchis saritu. Ujan ari pagi nyentuk ke lemai serta balat berangin. Temperature ari pan enda pungkang ari 15°C. 'Angat' nya!! Kira ka seminggu tu, ari tu bakatu belama. Endo berapo!!!

Ngarap ke salji turun maya nyuka ngintu Christmas ila. Munyi ka ribai, "Christmas time is more fun when there are snowfalls!" I wish........

Christmas mood.

Tumu endar udah meda hiasan krismas di shopping complex ba endur kami menyanak selalu supping. Tadi sebedau bebeli ke sayur, dulu raun ngelinggi supermarket, sambil ngambi gambar. Pama ga pemesai pasar nya, berasai pedis kaki bai bejalai baka nya. Kamera endang selalu dibai. Laban ke rumpas agi ari iya ke dulu suba, nyamai endar di tepuk ke dalam handbag aja.

hohohoho....

Teddy bears nyu baka kitang begantung kin kitu.

Kiut endar seduai tu!

Nya iya...! Bisi meh utai diati dia........

Ni Rudolph ke beidung mirah nya??

Bekelip2 dah kayu krismas....hmmmmm...enda sabar agi deka ngadu enggi aku empu!

PhotoScape

Tu meh pengawa aku dua ari ke udah. Betundi enggau programme ngadu gambar 'photoscape'. Tu sekeda gambar ke bai di peda ditu, bala anak jadi model. Semua gambar background/latar belakang, gambar diambi maya raun.

Anais enggau geng iya, Léa.

Norman & Denzel(nephews). Diambi di Hiltop Damai. Batu karangan ari Sarlat, France.

Eliya(niece). Bunga bouganvilla indai aku di Kuching.

Denzel. Gambar background ari Elne, France.

Aurélie (god-daughter). Bunga rose, tanam aku last summer. France

Lydia. Val d'Europe Aquarium, France.

Bejalai ngagai kaban....

Kemari, lemai ari enam, kami menyanak dikangau ke kaban aku (nyu udah betusut, enggai enda dikumbai kaban ga diatu), ke sama diau ditu beserumpu makai enggau sida menyanak ga. Lama udah enda betemu, nyu lelenggau ga. Taja 'semak' pendiau, tang jarang betemu , ketegal ke sama-sama ngati ke diri. Ngintu ruang bilik serta periuk ke diri empu, munyi ka urang tuai. Semak enda jaku, taja diau sama rumahpanjai, pan enda ga ulih betunga mua selalu, ney?

Ukai enda ransing, nyu enda berasai, jam mangkung pukul 1.30pagi baru mutar ke diri pulai ke rumah diri empu. Pama gak penyauh endur kami sebuat ari sida iya. Nyu sejam drivng baru datai di rumah. Bala anak nyu baka lengkung udah tinduk di belakang kerita. Bendar ngerak, madah ke udah datai...sinu meda, nyu ngigau ke mit !



Enggai enda mantai ke gambar mayau pangan aku mega. 2 iku. Sama2 rindu nupi mayau kami duai. Iya ke ari atas nyin, benama Jade. Iya ke kuning nya, Caramel. Pemerat lebih 6 kilo siku. Pama nanggung seduai nya. Kiut endar!

Bah, manah ari ujung minggu tadi? Bisi mindah?

Happy Weekends !

Nadai tentu berita aku sekali tu. Semina deka meri, "selamat ari ujung minggu (hepi wikin)", ke kitai semua.

Ngarap ke ari manah endur bbq, piknik, mandi di tasik tauka di sungai. Ngemata ke matapanas terbenam (sunset). Betundi enggau pangan diri, tang anang kelalu mancal, au !!

Aku pan deka beserumpu enggau pangan lemai ari enam lagi. Lama dah enda betemu enggau kaban, nyu lelenggau. Bah, mupuk aku.......

ABC special !

Semadi ke nadai pengawa saritu, tambah ari majak ujan, nadai endur ngeransing ke ati gak di luar. Aku lalu 'betilik' ke album lama aku ba internet tu. Siti ari gambar ke ditemu narit ati saritu, gambar mangkuk ABC spisil nya (dikumbai chandut tau meh.....), diambi di Kuching kemisi bulan enam tu tadi.

Naka gak pemesai kuasa chandut nya! Enti baka tau dijengkau ari skrin nya, endang nyuap menyuap chandut dalam mangkuk nya, ka asai ati din ! peiiiii dadak endar utai runding maya ari celap tu...... uuuu lalu berunding deka meli injin kena nganchur ais tu ila. Kena ngaga chandut/ABC spisil ditu. Prizin krismas sekali tu ahhh !

Ujan oh ujan !

Nadai ngetu ujan saritu! Ujan serta kabut. Ari pagi tadi nyentuk ke lemai tu. Berasai endar celap. Asai tik kak belungun enggau pua belama. Lalu enggai engkubut agi, ngenat ke penyamai dibungkur pua tebal! Mayau aku pan nemu enggai pansut keluar kin. Enti ari manah, tak kiau2 iya enggai lama dalam rumah tu. Tu gamal iya tinduk ba atas kerusi bekusyen urang empu !! Chit mansa deh enda dikibuh. Tang iya endang nemu, nadai chit ditu....mereti endar, ringat enti dikeduan! mut mut gamal mua iya...peiiiiii

Berita ari enam.

Tembu meh kemisi tu, nyu udah datai di rumah enggau selamat kami menyanak. Tu sekeda gambar ke sempat diambi ari dalam kerita tadi. Maya musim gugur tu, bala daun ba pun kayu betukar curak magang. Nyu ngujung ke pemanah rampa menua ke dipansa peda aku.

****************************************

Gambar ke dibaruh tu, sekeda gambar alam semulajadi ke dikerindu aku endar maya ke bejalai raun nya. Aku mai kita meda iya mega. Tambah kena aku nguji ke pengelandik ayam baru aku meh. Gambar burung jauh, ulih disemak ke. Makin jauh makin ransing zoom ke kamera nya...asiehhhh!

Have a nice weekend and 'Happy All Saints Day' everyone!

Nemuai ke Sarlat-le-Caneda

Saritu, ari ke penudi kemisi kami menyanak. Tembu meh kemisi kami ke sekali tu. Sulu ati endang besemaya deka mai ke menua ke dikumbai Sarlat. Suah ga udah kitu tang enda nemu leju meda pemanah bandar tu. Bandar Sarlat tu endang suah mega endur urang pengaga filem peranchis tauka ari menua bukai ngaga filem sida iya. Laban bangunan ditu, mayuh agi stail lama ke agi diintu enggau badas. Cerita baka 'The Hunchback of Notredam' nya meh gaya cerita wayang ke suah di lakun ditu.

Aku mega enggai enda madah petunggal aku Puteri udah dibai nemuai kitu taun 1995 suba. Agi belala iya meda pemanah bandar tu, serta ingat endar ke jalai sempit ke suah ditengah kami sebuat maya nya. Agi jalai sempit nya, ke nyu penuh tai ukui! cihhh enda berapo lebuh nya suba. Diatu anang irau agi Puteri, nadai pengirau ke ngindik tai ukui agi kita bejalai din. Udah bisi undang2 ngukum sida ke bisi ukui, ke neju ukui birak sebarang endur. Besai saman diatu! Tau masuk jil sida iya enti enda nitih ke nya !! Likun serta beresi agi meh Sarlat diatu.























Bah, mupuk aku! :-)

Ngelinggi Autoire.

Pagi tadi tumu kami menyanak mupuk ngagai 'Gouffre de Padirac'(klik ditu), enggai ke laun datai din. Irau ke jam tebasau laban ari enam ila deka mulai ke diri ke Paris. Agi mayuh gak endur deka di abas. Kira sejam lebih dribing kin. Datai ba endur gua baruh tanah din, nemu enda diasuh mai kamera...'no camera allowed', kenu notis ba penama din. apuuuu...hugi amai ! Tang bisi tukang gambar ngambi gambar kami sebuat. Siti aja !! :-(

Ngena perau melancung dalam nyin. Gua tu, gua baruh tanah ke pemadu besai di France.

Kira sejam lebih aja di pemendar ke nemuai kin. Udah tembu nya, ari nyu udah pukul duabelas tengah ari. Perut pan belabuh lapar. Mansang gak dribing ke bandar Autoire, ngiga endur makai. Ba restoran. Enti nyebut restoran ditu, baka kitai ke ka makai mee di pasar jauh kin. Canggih ka gamal restoran nya tang anang bekira agi...aram makai dulu. Enda tan lapar ! hehe

Entree: Foie gras - ati itit udah dikasam dalam cognac....mmmmmmm

Main course: Confit de canard - Pah itit, distew dulu udah nya dipanggang dalam oven. Disempulang ubi kentang enggau carrots. Masakn tebilang urang menua tu.

Cheese susu kambing. Salade nya kena ngiyas aja. Ka sejeput.

Desserte: 'Malakoff'- Whipped eggs desserte on english cream with caramel.

hahaha...enggi Anais, vanilla ice-cream dalam mangkuk 'sapi' !










Udah tembu makai lalu raun ngelinggi menua Autoire. Asai ke diau di 'middle-age'(zaman purba kala!) urang ditu. Gaya rumah, agi stail lama magang. Enti enda meda tiang antenna TV serta parabola satelite, ke nyu baka chuit ba perabung rumah urang, nadai nyangka sida tu udah masuk ke zaman modern. Tang tajapia, cukup manah menua tu, agi 'country' ka ribai.