Tasik Biru

Bala anak ikan 'duyung' meradai ba pantai Siar, Kuching.

Pantai Siar

Bukit Santubong peda ari pantai Siar.

Pantai Sampadi

Nyu majak jai ari kami ditu, nadai ngetu ujan enggau celap mega. Taja pan diatu udah musim bunga kira ka udah angat mimit enti nitih. Ngumba endar, nadai ulih pansut keluar, semampai basah enggau celap aja. Ati ka bebungkur enggau pua gali ngangat kediri depan heater aja. Enggai ga lama. Masang TV nadai ga cerita ngasuh ati gaga, selalu meh 'ulang tayang' , enti bisi cerita manah lagi nyu tengah malam ga di tayang sida, lembau ga meda, nyu berunding ke pengawa ari siti ga! Tambah mega belabuh ari demalam kami ditu betukar jam. Kurang sejam ari maia winter, nya alai enda nyamai pendiau kami ditu, kurang tinduk. Sida saintis macam2, nukar jam lah kenu kena ekonomi tenaga elektrik............

Bah, aram enggau aku, ngeransing mata meda pemanah tasik biru ! Gambar tu diambi aku maya kemisi taun 2007 suba. Pama meh, ngisa ke ulih muai pengelenggau tu. Pantai Siar tu terbilang endar endur orang mayuh ngerindang ati ujung minggu. Alai ia antara Lundu enggau Kuching. Pantai siti nya kumbai urang Pantai Sampadi enda jauh ari Siar mega. Aku tekenyit meda Pantai Sampadi bisi di ayan ba Youtube. Sapa bisi ati deka meda ia peda ba 'link' tu.

http://fr.youtube.com/watch?v=wal2UKSd6AM

http://fr.youtube.com/watch?v=DSQgD9WkRSA

Semadi Nadai

Tu meh agi pemayuh mee rebus 'maggi' ke dibai aku pulai kemisi taun 2007 suba. Bendar ngasuh bala anak ngelimat, enda ngasuh makai selalu, kasih tudah. Agi ga ulih tan ngagai ujung bulan enam ila. Nadai ibuh ke 'expire date' ba tiap pikit mee nya semina ngagai 13/05/2008 aja.

Udah ke nemu kiub ikan bilis tu nyamai kena ngulai lauk sayur endang enda kala enda ingat mai ari menoa nyin. Nadai orang nyual kiub tu ditu, semina kiub dagin bisi ga. And kiub Tom Yam Sup, kena ngangat ke tubuh maya musim celap ditu. Endang amat cun!

Aha! Tu tubu datai ari menoa Cina, dalam butul. Tubu tu bisi di jual ditu, taja pan ka masam mimit. Enti ka kiruh, rendam dalam mangkuk ai celap kira sejam. Sebedau di bela, buai ai dulu, di guring gulai enggau kiub ikan bilis tadi.....apuuuu, idup nyawa!

The top 10! Nya ia belacan di jual ditu, dalam 'container' enggai ke bau ia pansut. Taja pan penyamai ia alah ari belacan bungkus menoa kitai, tang 'boleh tahan' ga, tau di kenyadi, maya suntuk. Manah amat nama ia datai di menoa peranchis : 'pâte de crevette' (shrimp paste). Di impot ari menoa Thailand.

Keling enggau Kumang Peranchis Taun 2008

Weewiiiittt!! Ia ke tengah nya Mister France taun tu. Nama ia David Meitai. Di sebut "maytai". Berasal ari Pulau Tahiti. Berumur 23 taun. Gawa jadi pengajar (PE teacher) di siti kolej di Paris. Peninggi ia 1m 83cm. Pemerat tubuh ia 84 kg. Bermata cokelat. Ia di padu ka jadi lelaki ke pemadu sigat menoa Peranchis kena 07/03/2008. Sigat ke enda peda kita?

Nama ia Valérie Begue. Sebut kitai "Bek". Ia di padu ka jadi Miss France taun tu. Baru 22 taun. Ia ada di Pulau Reunion. Siti agi pulau koloni Peranchis, tunga ke Indian Ocean ( Tasik India). Peninggi ia 1m 74cm. Bermata cokelat campur gadung. Ia tu bisi kacukan bansa India, Cina, Irish enggau Peranchis! Baru nerima ijazah ia ari Universiti, ngambi pengawa Dagang Luar Negeri.

Makai ba restoran.

*

*

Manah amat gamal decoration ba capak aku nya. Menu nya ikan di balut bacon panggang, sejeput sayur buah kechula di sirap halus di gulai enggau bawang telur/besai di sirap mit mega. Udahnya, tumpuk utai ke kuning nyin, ubi kentang rebus gulai butter enggau sigi tomato panggang ga. Lalu semoa tu tadi di sempulang ke sos gulai minyak olives. Ai irup ? Sorry, nadai ai ngapa, mesti ngirup white wine. Ngerecam moa sida waiter enti kitai minta ai buah!

*

Kami duai apai tuai aku makai ba restoran tu kena ngingat ke sari nya, Ari Indu Sedunya (08/03/08) minggu nyin suba. Manah amat, rindu ga, orang mai bebasa ke kitai, enda pia? Lemai nya gaga meh nadai berapi di rumah, taja pan udah nya meda rega utai ke diempa nya, pejam mata! Tambah mega, ka madah ke enda nyamai, tau ga di pakai maia ke lapar, tang enda aku inggap ditu kediri. Tersinggin ati din ngarap ke orang mai ngagai restoran Cina tauka restoran Pizza, ngambi ke ulih makai lauk panduk Cina tauka pizza gaga orang Italian. Tang nadai ka enggau lah, titih aja, laban ke enda kala makai ba endur tu, ka nguji ia. Diatu udah di uji, tau di keliah lah! Tang anang saru ga, enda semoa ga masakan orang peranchis style baka tu, maioh udah resepi sida udah di uji, tau di kenang penyamai ia. Ila aku mai kitai, nguji siti ari utai panduk orang ditu.

*

Dalam semoa menoa Europah tu, pemakai panduk orang peranchis ke terbilang agi di seluruh dunya. Sida ia mega amat megah ke keju/cheese sida ia. Mesti makai keju, manah ke pengerai, nguat ke tulang kelebih agi ke nembiak ke baru mansang. Kenu ka sida ia, menoa tu ngundan 365 bansa keju! Reti nya nuan makai, cukup bansa keju tiap ari dalam setaun. Dalam statistik aja tu, ni tan makai semoa keju nya, makai ia tiap ari, tambah sekeda ia, amat enda tan kitai nyium bau ia. Aku terubah suba ka ga enggau nyengkau mimit, diatu kira ke neju sida anak aja, manah ke sida ia deh! Aksen..................

Palm Sunday

" Thou art my Savior and I will praise thee, thou art my Savior, I will exalt thee." Psalm 118:28.

Lukisan tu di kumbai " Jesus masuk ke Jerusalem " di lukis ke Master of Capella Palatina ari Palermo, Italy. Lukisan tu mega tanda mata ari Greco. Byzantine workshop di beri ke Roger II, taun 1150 kelia.

Lukisan siti tu tau dipeda di Parish Church di Zirl, Austria.

Nama reti Palm Sunday ?

Orang Kristin nyambut Palm Sunday, kena ngingat ke Jesus ke masuk ke Jerusalem sebedau ia ke mati ba regang lalu pulai idup baru. Palm Sunday mega tau di kumbai Passion Sunday ba sekeda pengarap Kristin.

Dalam bup Injil, madah ke Jesus masuk ke Jerusalem nunggang keldai (donkey) di sambut orang maioh enggau gaga ati nibai ke daun nyiur. Dalam penemu orang kelia di menoa Jerusalem penatai orang besai tauka orang ke terbilang nama mesti di sambut enggau cukup basa bakanya, nibai ke daun nyiur, belagu enggau betanda kena ngenatai ke ia.

Aku meri selamat hari Palm Sunday ke kita semoa, lalu arap ke kitai gaga mega ati begulai enggau diri sebilik ba ari ke berkat tu enggau selama ia meh!

God Bless us all.

Raun ke Berlou (3)

The Cathedral of Béziers

The promenade.

The Cathedral.

Dalam Cathedral, Béziers.

Same as above.

Jalai sempit.

Ancient windmill.

Ladang buah apple, benung berbunga.

Happy Viewing!

Raun ke Berlou (2)

Bunga buah chestnut.

Berlou

Roquebrun

Mediterranean Garden, Roquebrun.

View ari Mediterranean Garden.

Béziers

Roquebrun enggau Béziers tu bandar ke enda jauh bertampil enggau Berlou.

Raun ke Berlou (1)

Ari aku ngambar tu, ke Montpellier agi 281 km to go!

Vieussan Village

Ladang anggur

Bejalai kaki, meda menoa!

Bukit endur nanam anggur

Akar anggur

Menoa Berlou tu tunga ke selatan menoa Peranchis. Gaya menoa tu berbukit serta enda celap. Gaya tanah ditu berbatu lalu enda tentu maioh kayu tumbuh. Kemaioh agi nya kayu 'ru' ka kitai, baka sida 'pine trees' nya. Selain ari nerima temuai (tourists) kelebih agi maia musim panas, orang ke empu menoa tu maioh nanam anggur kena ngaga wine. http://www.berloup.com/english/index.asp

Akar wine tu ka agi tumbuh ba tanah ke kumbai kitai tanah rangkai. Maia ke diatu ia benung nungkul, nyu ka musim bunga ila nya baru ia berbunga serta berdaun. Orang 'ngetau' ke buah anggur ia nya kira bulan sembilan ila tauka bila buah ia udah mansau. Tempat tu kira ke agi jauh ga ari Montpellier, kira sejam ngena highway. Ari Paris tu kira 8 jam driving!

Beauty spot (Moles); Grains de beauté ; Taie lalat ............

Bendar aku berunding ke nama kebuah dalam jako iban, taie lalat nya di kumbai kitai bakanya lalu nadai ngena sempama bukai kena madah ke ia manah agi ari nyebut ia taie lalat!

Beauty spot (moles) ba jako English reti ia, tanda pemajik (penyigat), dalam jako Peranchis nyuka sama ga, reti ia leka pemajik (penyigat). Majak ke jako iban, taie lalat, di 'translate' ngagai jako dua bansa ke udah disebut aku nya reti ia "fly shit"! Apu, jauh amat penyelai ia, tang nadai ke enggau meh, kena ngetan ke jako iban ngambi ke enda pupus, disebut kitai enggau cara berpantun meh ga. Aku enda nemu nusun jako ngaga pantun, barang sapa kita ke nemu agi, anang enda meh ngaga pantun berpun ke taie lalat.

Tiap iko kitai mensia endang ngembuan taie lalat lalu endur ia lekat endang bisi reti ga ba siko-siko kitai. Amat ke enda, nya berpangai ba kitai empu ga enti kitai arap tauka enda.

Ari mit, aku ninga orang tuai madah ke, enti kitai bisi taie lalat ba pending, kiba tauka kanan, nya orang temil, nadai ka ninga ke jako, binking! Taie lalat ba bau 'shoulders' ka orang putih, selalu 'ngema' beban, penusah diri sebilik. Issshhhhh! aku maioh endar taie lalat ba bau, engka tak 'cirit' lalat sari nya!! Ketawa kita macha tu, tang nadai aku ibuh ke nya, enti bisi penusah/penanggul kami sebilik, Endu tu meh, nyelesai ke ia, ka aku madah ke sida indai aku. Ni maia agi deh, nyu padam seput ila, ni ulih agi mantu sapa-sapa agi.

Mulai ke randau kitai pasal taie lalat tu, enti di tulis ke semoa reti endur ia ba tubuh kitai, engka enda cukup blog aku tu. Nyalah, ba aku empu, 100 peratus arap, bedau ga aku tu tetap amat, tang aku bisi taie lalat sigi ke amat berkesan. Mulai ke pengingat agi aku umur 7 tauka 8 taun kelia. Kami pulai kemisi ke rumah panjai sida indai aku di Nanga Drau, Saratok. Terubah ia apai enggau indai aku mai kami menyadi pulai kemisi ke menoa. Gaga amat meh orang rumah panjai meda kami datai, sida ini, aki enggau kaban belayan bukai meh. Kami menyadi gaga mega disambut enggau jari terbuka, lelenggau ke kami sebuat. Udahnya, kami di bai tama ke bilik sida indai aku lalu ngenat ke diri. Kelia taun 1973, jalai ari Kuching ke Saratok benung di gaga, ukai baka diatu, agi jai jalai maia nya, lelak meh udah nya. Duduk meh kami ke datai ari negeri konon nya, ba tikai udah dianchau, kaki unjur, ngirup kupi, makai ruti udah di sedia ke ibu aku ke ngibun bilik nya. Berandau meh enggau bala ke nyempulang kami ke bilik nya. Aku empu, laban ke agi mit, nunda aja nama pengawa orang ke tuai, apin bisi ati ka enggau bala anak mit rumah panjai ke udah bertundi, bergagai di ruai. Agi malu terkuyong meh nya!! Duduk sepiak aku ari kiba, agi ingat amat, petunggal indu niang ini aku kelia, ini Awan ke kami ngangau ia. Ia lalu ngerandau aku, nanya berita meh nya, nyaut tungal-tungal ga aku, agi malu, nyu ngeleput ke asai, sempat baru ga aku ngunjur ke kaki aku nya baka indai aku, ka ati aku din. Enda mukai-mukai, ini nya tadi terpeda ke tumbit kaki kiba aku bisi taie lalat, mesai leka cabi. Aku ngelama nyin nadai kisah langsung pasal ia, lansik endar ga mata tudah ini aku nya. "Apu Endu" ka ia, " jauh pejalai nuan tu ila. Maioh menoa di pansa nuan" ka ia. "Au, anang2 belaki ke orang luar negeri" ka sekeda ga enggau ketawa. Nama agi aku, merontak, ngenggai, laban ke agi mit, beli, sikok2 nyabak enggai ningal ke indai aku, ka aku.

Nyah, kati bah, ma aku berunding ke jako padah ini Awan nya suba, bisi pemendar ga nya, amat nyadi 'ramalan' ia nya kelia. Sigi jauh pejalai aku, maioh menoa udah di pansa, tambah agi belaki ke orang luar negeri!! Amat manah meh nasib aku nya ke bisi taie lalat ba kaki nya. Nyah diatu, aku enggau gaga ati tau mai kitai semoa meda gambar, berandau enggau aku ari menoa jauh tu.

Oh! Sabar, sabar kih, agi milih gambar ke ka di post ba blog aku tu pagila.