Sinu amat meda berita urang ke tasah laban tanah berenyang di L'Aquila, kira 120km ke utara Rome di Italy. Ke diatu lebih 1,500 urang bakal, 207 mati dalam penusah tu ke jadi kira pukul 3:00 dini ari kena 06/04/2009 kemari. Ni penyampau urang ke bedau ulih ditemu giga ari endur sida ke ditambun bala utai ke labuh benung tanah nya ke runtuh. Serta beribu-ribu iku urang ke nadai agi rumah endur diau.
Kenu ka berita, sebulan sebedau penusah tu nyadi bisi siku pakar kaji bumi bansa italian empu, Gioacchino Giuliani , madah ke datuk bandar menua L'Aquila tu tentang gas racun ke pansut ari lubang tanah, ke benung di kaji ia, enda jauh ari menua nya. Ia lalu ngasuh datuk bandar nya nesau rakyat ia ngambi ke besedia maya penusah nya ka datai. Tang nya meh, laban siku-siku kitai mensia tu enda sama runding, dia datuk bandar nya lalu nyaman Gioacchino Giuliani, madah ke ia mansut ke berita bula.
Sangka aku, ukai enggai ga datuk bandar nya enda arap ke ramalan si pakar nya. Laban ia ke megai menua, enti sema penusah tu enda nyadi, tak pecuma ngapa ga ia di kutuk rakyat ketegal kelalu beguai betindak. Tang diatu, nyu udah amat-amat nyadi, besampi meh kitai ke sida ia din, ngambi ke jampat berunding mulai ke pengidup sida ia baka ke selama tu.
No comments:
Post a Comment