Ruai genap setaun.

Baru teringat ke saritu ruai aku udah genap tiga belas bulan. Nyu udah setaun meh! Aku belabuh muka randau aku ia ke endar kena 25hb Februari, 2008. Nya meh, baru saritu aku sedar ke nya.

Enda nyangka ke diri ulih ngenan ke tugu tu ngelama nya. Sebedau belabuh enggau 'ngeruh ke ai' dalam dunya siber tu, aku ngaku ke diri endang enda tentu landik nulis dalam jaku iban. Jaku iban endang enda kala puntang seruran diingat belama tajapan ditu enda dikena ari ari jaku kitai nya. Jaku peranchis nyu bebelit dilah nya meh kena aku berandau enggau urang empu menua tu. Nya aja jaku temu sida iya! Alah sida ia laban aku, aku munyi ke muji diri, 4 bansa jaku ulih dikena berandau, iban, melayu, inglish enggau peranchis. Tang kekadang bisi maya saru jaku dikena maya ke gagit berandau, wai. Ngenung pangan ke betunga mua enggau berandau, pesap pesap mata, enda nemu nama jaku ke kena aku udah nya...ngujung ke lekik lekik ketawa ngenang ke penadak diri !!

Enti aku ngenang ke diatu, aku benasip udah besekula di menua iban. Setaun aja, ia nya taun 1974-1975 di SRK St. Peter, Saratok. Primari 3 aja aku dia. Tiap taun kami menyadi betukar sekula laban nitih ke apai aku ke suah dipindah endur gawa. Nyuka seluruh Sarawak endur besekula ; Kuching, Saratok, Binatang (Bintangor), Sibu, penudi ia nyu udah datai ba sekula sekendari baru bala kami pulai baru, lalu netap di Kuching. Ba SRK St. Peter meh aku belabuh nemu macha serta nulis dalam jaku iban. Di ajar ke Cikgu Ringgit. Terubah ia ga meda bup ditulis dalam jaku iban seratus peratus! Endang pengingat enda ulih dibuai maya nya kelia. Semina siti penyesal, laban enda lama besekula dia. Ti ngasuh tebengkalai mimit penemu dalam jaku asal kitai.

Aku baru tepeda ga ke ruai apairosa. apuuu..familiar endar ensera Apai Sali ke dibantai iya dia. Agi rindu aku macha, wai ! Ke bala ke ka nemu lebih dalam agi pasal jaku, asal usul enggau adat iban, aku mai kita nyengguk ke ruai GNMawar.

Bah, aram ngangkat ke jari ngenggam gelas, tuang ai tuak, urin, lemenit kini enggau aku berami ditu. Nyambut ari baday ruai aku saritu...ooohaaaaa ooohaaaaa !!!!! :-)))